Flakkað um firði er auðfarin ferðaleið yfir sumartímann, hlykkjóttir firðirnir og spennandi gönguleiðir draga erlenda jafnt sem innlenda ferðamenn að. Þegar sólargeislarnir lenda á spegilsléttum sjónum á rólegum sumardegi er hvergi betra að vera en flakkandi á milli fjarða á Austurlandi.
Vissir þú að Austurland státar af einhverjum hlýjustu sumardögum á Íslandi? Það ætti því ekki að koma neinum á óvart að fólk flykkist í miklum mæli austur á land yfir sumarmánuðina til þess að njóta veðursins, spila golf og fara í gönguferðir í miðnætursólinni.
Seyðisfjörður iðar af lífi á sumrin. Vikulega koma ferðamenn frá meginlandinu í fjörðinn með Norrænu, sem siglir frá Danmörku til Seyðisfjarðar með viðkomu í Færeyjum allan ársins hring.
Á sumrin er tilvalið að heimsækja Mjóafjörð, enda einungis fært fyrir bíla yfir hlýjustu mánuðina. Vegurinn yfir Mjóafjarðarheiði er hlykkjóttur og fallegur og eru gestir beðnir um að sýna aðgát þegar keyrt er yfir heiðina. Útsýnið er stórfenglegt þegar komið er niður í fjörðinn og ef bíllinn er rétt útbúinn (fjórhjóladrifinn) er hægt að keyra hann endilangan að Dalatanga – sem er austasti hluti landsins.
Þegar ekið er niður á firði taka á móti gestum bæirnir Reyðarfjörður, Eskifjörður og Neskaupstaður. Allir hafa þeir sín sérkenni og í raun ótrúlegt hve ólík menningin og sagan er á milli staðanna þó vegalengdin sé stutt. Á Eskifirði og Neskaupstað er að finna góða sjávarréttarstaði sem bjóða upp á ferskasta fiskinn úr firðinum hverju sinni. Bæirnir eiga það allir sameiginlegt að vera fjölskylduvænir og ættu allir að geta fundið sér eitthvað til dægrastyttingar – hvort sem það er að skella sér í sund, kíkja á söfn eða ganga um fjölmargar náttúruperlur svæðisins.
Þeir sem „flakka um firði“ ættu ekki að vera í teljandi vandræðum með að eyða nokkrum dögum á svæðinu – án þess að láta sér leiðast. Hægt er að kynna sér sögu verbúða í norsku síldarsjóhúsi á Eskifirði, Stríðsárasafnið á Reyðarfirði gerir tímum Breta og Bandaríkjamanna í seinni heimsstyrjöldinni á Íslandi góð skil og Náttúrugripasafnið í Neskaupstað hefur að geyma stórt safn af fuglum og fiskum sem finnast hér á landi.
Náttúruperlurnar leynast víða á ferðaleiðinni. Fossagangan á Seyðisfirði er skemmtileg gönguleið fyrir alla fjölskylduna þar sem fögur fjallasýn, fossar og saga er í forgrunni. Helgustaðanáma í landi Helgustaða í Eskifirði er gömul og jafnframt ein frægasta silfurbergsnáma í heiminum. Silfurbergið í námunni er friðlýst og stranglega bannað er að hafa minjagrip með sér heim – engu að síður er þetta skemmtileg upplifun fyrir alla aldurshópa.
Ferðaleiðin endar á Neskaupstað sem er tilvalinn áningarstaður fyrir þreytta ferðalanga. Hér gefst tækifæri til þess að snúa við og halda aftur til Egilsstaða – eða þá í suðurátt og halda vegferðinni um firði Austurlands áfram. Hægt er að tengjast beint inn á ferðaleið sem liggur um Austurströndina og er þá ekið í átt að Fáskrúðsfirði.
Við mælum með að taka góðan tíma í ferðalagið til að njóta sem best þess sem fyrir augu ber á leiðinni. Hægt er að útbúa eigin útgáfu af ferðaleiðinni með því að nota „Mitt uppáhald“ möguleikann hér á síðunni. Þannig getur þú skipulagt draumaferðalagið þitt um Austurland á þann hátt sem þér hentar best. Góða skemmtun!
